LAOAG CITY – Dinillaw ken inreklamo ni Sang Panlungsod member Jason Perera ditoy ciudad ti Laoag dagiti mailaklako a makan iti “Pasalubong Center” iti maysa a mall iti Barangay 1 iti ili ti San Nicolas.
Daytoy ket gapu iti kaawan ti label na partikular ti Expiry date ken manufacturing date dagiti nagduduma a produkto manipod iti nagduduma a lugar ditoy pagilyan a mailaklako iti nasao a mall.
Inlawlawag ni Perera nga idi napan iti lugar ket dinamag na no kaano nga ag-expired dagiti nasao a produkto ngem awan ti naibaga dagiti aglaklako, ngem ketdi inpasigurado da laeng kenkuana a dagiti nasao a produkto ket kaar-aramid isut gapuna a naallukoy a gimmatang, karaman ditoy ti bucheron.
Nupay kasta, iti panangidanun ni Perera daytoy a banag ken ni Atty. Yvette Leynes, ti provincial administrator ditoy probinsya ket saan met nga inanamongan ti naud-udi daytoy ken idi kitaen na dagiti ginatang na ket naripar na nga addaan payen dagitoy ti kolor a berde.
Inpetteng ni Perera a masapol a maaksyunan daytoy a banag tapno maliklikan ti possible a pannakasabidong dagiti tattao isut gapu na nga inbilin na iti nakaduty a guwardya a tawagan na daytoy no addan ton ti mabalin na a pagreklamoan iti biang ti nasao a mall, ngem agpapan maisursurat daytoy a damag ket awan pay ti timmawag iti nasao a konsehal, rason nga indanun na iti Department of Trade and Industry (DTI).
Mainaig iti daytoy, inbatad ni Mr. Dominador Alberto, ti mangidadaulo iti DTI ditoy ciudad ti Laoag a kalpasan a naawat na ti reklamo ni Perara ken inbaon na a dagus dagiti tao na tapno mapan da inspeksyune dagiti lako iti nasao a mall.
Inpakaammo na a kas resulta ket inbilin da ti pannakaikkat amin dagiti produkto iti mall nga awan ti label na.
