LAOAG CITY – Inbatad ni Konsehal Jason Perera a saan a mabalin a mapagbalin a pribado ti Laoag City General Hospital (LCGH) ditoy ciudad ti Laoag.
Inpetteng na a ti Laoag City General Hospital ket nadisenyo ken napatakder para kadagiti marigrigat.
Inpalgal ni Perera a kaykayat na pay a maipaima ti ospital iti Department of Health no saanen a kabaelan a patarayen ti gobierno lokal ditoy siudad.
Inyarig pay ti konsehal dagiti dadduma a dadakkel a pribado nga ospital a nangrugi iti nababa agingga nga in-inot a ngimmato babaen ti bukod da a gastos.
Kuna na a maburburtiyaan no apay nga iti Laoag City General Hospital a gastos amin ti gobierno lokal ditoy siudad ti pannakaipatakder na ket rumrumuar a maluglugi rason a nakuna ti konsehal a mabalin nga adda ti problema ti management ken ti operasyon ti nasao nga ospital.
Insingasing pay ni Perera a no kastoy ti mapaspasamak ket baliwan ti istratehiya, ngem no madi latta ket sukatan dagiti mangimanmanihir wenno mangipatpataray iti ospital.
Mainaig iti daytoy, inpaganetget ni Perera a saanna pulos nga anamongan ti lungalong nga isuda ti mapan dumanon iti Laoag City General Hospital tapno agsaludsud kadagiti mangimatmaton iti ospital seknan kadagiti nagduduma nga isyu ken problema iti nasao a balay-pagagasan.
Innayon na nga adda ti konseho nga isu ti umiso a lugar a pangtrataran da kadagiti problema iti Laoag City General Hospital.
