LAOAG CITY – Kwinestyunaran ni Konsehal Jason Perera ti panagimbestigar ti Philippine National Police ditoy ciudad ti Laoag iti maipagarop a suicide incident iti kallabes.
Segun kenni Perera, saan a nasurot ti usto a wagas ti panagimbestigas ti nailian a pulisya.
Daytoy ket gapu ta awan ti napan a kameng ti Scene of the Crime Operatives (SOCO) iti lugar a nakapasamakan ti insidente ken awan ti innala dagiti maseknan nga otoridad nga ebidensya iti laksid nga adda ti suicide note.
Kuna ni Perera a kayat da koma nga ipa-hand writing examination ti suicide note tapno maamoan no pudno metlaeng ti pirma ti maipagarop a biktima ngem awan ti naited ti nailian a pulisya.
Malaksid iti daytoy, saan pay a nangala ti Philippine National Police ti kopya ti Closed-circuit television (CCTV) iti lugar.
