LAOAG CITY – Kwinestyunaran ni Sang. Panlungsod Member Jason Perera ti kinaawan ti anesthesiologist iti Governor Roque Ablan Senior Memorial Hospital iti tunggal aldaw ti Sabado ken Domingo.
Namunganay daytoy kalpasan ti napasamak a pammagkong iti Brgy. Dibua South ditoy ciudad no sadinno kasapulan a mataming ti maysa nga indibidual ngem awan ti presensya ti anesthesiologist.
Gapu iti daytoy, kasapulan pay laeng nga maipan iti Mariano Marcos Memorial Hospital and Medical Center (MMH&MC) iti ciudad Batac nga aboten pay laeng iti agarup 30 minuto a biyahe.
Mainaig ti daytoy, kiniddaw ni Perera ti Memorandum of Agreement iti nagbaetan ti Governor Roque Ablan Senior Memorial Hospital ken iti Laoag City General Hospital gapo ta adda ti anesthesiologist ti Laoag City General Hospital, ken tapno saanen kasapulan pay a mapan dagiti maseknan iti Mariano Marcos Memorial Hospital and Medical Center.
