LAOAG CITY – Nabastusan ni Konsehal Jaybee Baquiran iti nagbalin a sungbat iti maysa nga inhinyero nga empleado iti City Engineering Office ditoy ciudad ti Laoag.
Daytoy ket kalpasan a nakisarita ni Baquiran a mapan koma kitaen ti inhinyero ti daga iti Brgy. 1 ditoy ciudad no adda iti panagkamali dagiti maseknan a gimmatang gapu ta arigna awanen ti espasyo iti pader da manipud iti mohon.
Inbatad na nga iti panangidanun na daytoy a banag iti umuna ken maikadua a daras ket saan a nasango ti inhinyero a napan kinita gapu ta maipagarop a naka-field daytoy.
Nupay kasta, kuna ni Baquiran nga iti maikatlo a daras a panangibagana daytoy a banag iti inhinyero ket arigna nabastusan gapu iti nagbalin a sungbat na nga iti laengen sumaruno nga aldaw ti papanna panangkita gapu ta matapukan iti sapatos na.
Gapu iti daytoy, inpasingked ti konseho a paimbestigar da ti nasao a pasamak.
