LAOAG CITY – Kalikagom ni Sang. Bayan Member Lourdines dela Cruz iti ili ti Solsona a maitantan ti pannakaipatungpal ti Provincial Ordinance 046-2023 wenno ti panagusar ti high visibility vest iti intero a probinsya.
Iti privileged speech ni Dela Cruz iti sesyon da, inbatad na a namunganay ti resolusyon na iti ado a reklamo ken saludsod nga inpadanon kenkuana dagiti umili.
Segun kenni Dela Cruz, maysa kadagiti saludsod a naawat na ket no sadinno ti pagbayadan na ti multa no bilang ti maysa a motorista ket natiliw iti sabali nga ili wenno ciudad ken no communtiy service, sadinno met a lugar.
Karaman pay kadagiti kalikagom na a malawlawagan ket no saan a maikontra ti Provincial Ordinance 046-2023 a panagusar ti visibility vest iti DILG Memorandum circular 2020-036 a naiget a maipawil ti panagdalyasat dagiti tricycle, pedicabs ken motorized vehicles iti national highway.
Daytoy ket gapo ta ti ordinansa ti probinsya ket arig na maipalubos ti panagdalyasat dagitoy iti national highway laketdi agsuot dagitoy ti high visibility vest.
Kabyatanna, inpetteng ni Dela Cruz a saanna a konkontraen ti Provincial Ordinance no di ket kayat na laeng a sakbay a naan-naay a mai-implementar ket masolbar pay laeng dagiti reklamo ken queries dagiti umili.
