LAOAG CITY – Naglikudan ni Sang Bayan Member Mark Dennis Del Castillo iti ili ti Solsona ti naireport ditoy Bombo Radyo Laoag a napan na pinagsasawan dagiti agbakuna kontra iti covid-19 gapu ta maipagarop a saanda a kayat a bakunaan ti private driver na.
Daytoy ket gapu ta ti mabakbakunaan iti dayta a gundaway ket ti A4 Group a pakairamanan dagiti driver ti Public Utility Jeep (PUJ) ken tricycle.
Inlawlawag ti konsehal a namindua a daras a napan ti driver na ngem saan da a binakunaan uray ti akin-schedule ket dagiti addaan ti commorbidities na no sadinno a ti private driver na ket addaan ti hypertension.
Inpetteng na a basar iti driver na ket sapulen dagiti agbakuna ti reseta no pudno nga adda hypertension na idinto nga iti met laeng mismo a Rural Health Unit (RHU) iti ili da ti pangal-alaan na ti maintenance na.
Inpalgak na nga idi maikatlo a gundaway a mapan ti driver na ket saanda manen a bakunaan gapu ta inbaga da a primary contact daytoy idinto a 21 nga aldawen ti napalabas sipud nakapulapol na ti maysa a kameng ti konseho a nagpositibo idi ti covid-19.
Inadmitir ti konsehal a nakaunget gapu ta saanna a maawatan no ania ti kayat a parwaren dagiti agbakuna idinto a nabayagen a mapan agpilpila ti driver na gapu ta kayat na ti mabakunaan kontra iti covid-19.
Nupay kasta, nabakunaan met laeng ti driver na iti maikatlo a gundaway a panagsubli na iti pakaiyus-uswatan ti vaccination rollout iti ili ti Solsona.
