LAOAG CITY – Inlawlawag ni Konsehal Marvin Pascua iti ili ti Solsona ti takder na iti panangkiddaw na iti konseho ti pannakaipalubos ti sugal iti baraha ken madjong iti minatayan iti nadakamat nga ili.
Inrakurak ni Pascua a namonganay ti kiddaw na gapu kadagiti mangmangngeg na a sentimiento dagiti kalugaran na a nagminatay.
Inpalagip na a ti panagsusugal ket maysa a tradisyon dagiti Pilipino a manggutigot iti ado a tattao a mapan makiandingay kadagiti minatayan.
Nupay kasta, kuna na a gapu iti pannakapaiget ti pannakaimplementar ti linteg kangrunaan na ti Presidential Decree 1602 wenno Illegal Gambling ket adon dagiti nagbaliw no sadinno nga awanen dagiti practice a mapan mangandingay kadagiti nagminatay.
Inbatad pay ni Pascua a saan laeng nga umado dagiti mapan mangandingay kadagiti nagminatay no maipalubos ti sugal no di ket matulungan pay dagiti maseknan gapu ta adda ti maited kadakuada a porsiento manipod iti Tong.
Inpakaammo na a ti maited a porsiento manipod iti Tong ket dakkel a tulong para kadagiti agminatay kangrunaan na ti usaren da a paggatang kadagiti nagduduma a kasapulan kas ti kape ken dadduma a pagpameryenda, karaman payen ti usaren da nga agpamunpon.
Inpalgak ni Pascua nga adda ti linteg a maipawil ti panagsusugal iti minatayan ngem ti patien na a rason no apay nga ad-adda pay a pinaigetan ti gobierno ti pannakaiyimplementar daytoy ket gapu iti pannakaabuso na kalpasan nga adda dagiti nagruwar nga Atong King ken Atong Queen.
Mainaig iti daytoy, inpakaammo ni Pascua nga iti inpasa na a resolusyon seknan iti panangkiddaw na ti pannakaipalubos ti sugal kadagiti minatayan ket naipalaon ditoy dagiti guidelines ken limitasyon no sadinno a dagiti laeng residente iti ili ti Solsona ti mapalubusan nga agay-ayam.
Innayon na a saan pay a mabalin nga agay-ayam dagiti menor de edad ken dagiti aggapo iti sabali nga ili ken ciudad gapu ta no adda dagiti dayo a mapan makisugal ket patien na a sabali ti gagem da.
Kabayatanna, ipakaammo ni Pascua nga adda pay ti maysa a resolusyon nga inpasa da iti konseho a naiturong iti House of Congress babaen iti opisina ni Ilocos Norte 2nd District Representative tapno kiddawen da a mangipasa da ti linteg a mangamendar iti probisyon ti gambling Law tapno maikkan ti exemption a dagiti minatayan ket mapalubusan nga agsusugal ngem maikkan ti limitasyon ken guidelines.
