LAOAG CITY – Naideklarar kas persona-non grata ni Konsehal Marvin Pascua iti Barangay Santiago iti ili ti Solsona.
Segun ken ni ABC President Renato Garcia iti Barangay Santiago iti ili ti Solsona, ti resolusyon a mangideklarar ken ni Konsehal Pascua kas persona non grata iti barangay da ket inlungalong ni Barangay Kagawad Elissa Ramos a sinegundaran met ni Barangay Kagawad Anita Benito.
Inpakaammo ti ABC Presidente nga immanamong met amin dagiti dadduma pay a kagawad iti Brgy. Santiago iti ili ti Solsona.
Inlawlawag ni Garcia a namonganay ti panangilungalong ni kagawad Ramos iti nasao a resolusyon iti maipagarop a panangkwes-kwestyunar ni Konsehal Pascua iti nangabak kas Miss Solsona 2025 a ni Miss Princess Jerinne Aquino gapu ta ado dagiti mangibagbaga a saan a kwalipikado agsipud ta saan a residente iti Barangay Santiago.
Rumrumuar pay a kalikagom ni Pascua a maibabawi ti korona manipod ken ni Miss Aquino, banag nga ibilang ti pamilya, kakabagyan ken amin a residente iti Barangay Solsona a nakaibabainan da.
Inpetteng ni ABC President Ramos a gapu iti daytoy nga inaramid ni Konsehal Pascua ket saan payen a kayat ni Miss Aquino ti rumuar iti balayda gapu iti ibilang na a nakaro a pannakaibabain na.
Kabayatanna, inadmitir ni Konsehal Pascua a nakigtot idi naamoan na a naideklarar isuna kas persona-non grata iti Barangay Santiago gapu ta saanna a ninamnama a ti panangidanun na laeng iti proper authorities iti pakaseknan daguiti dadduma a residente iti ili ti Solsona ket isuna ti nagbalin a dakes.
Inpalgak na a no kitaen ti grounds ti person-non grata ket saan nga umdas ti nagibasaran dagiti opisyal iti Barangay Santiago tapno ideklarar da daytoy kas persona-non grata.
Inpaganetget ni Pascua a kayat laeng dagiti dadduma a residente a maamoan ti kinapudno gapu ta napaneknekan a ni Miss Solsona ket residente ken registered voter iti Barangay 24 ditoy ciudad ti Laoag.
Innayon na a para kenkuana ket deserving ni Miss Solsona ti panangabak na gapu ta napintas ken talentado, ngem ti laeng kayat a maamoan ti kaadoan ket no pudno a residente iti Barangay Santiago, banag a saan a naaramid dagiti maseknan nga inlawlawag daytoy a banag.
Patien ni Pascua nga adda ti maris pulitika na ti pannakaideklarar na kas persona-non grata iti nadakamat a barangay gapu ta ni ABC President ket aktibo a numero uno a kadwa ti mayor iti ili ti Solsona.
Mainaig iti daytoy, inpakaammo ni Pascua nga awan pay ti naawat na a kopya ti resolusyon a nakaipalaunan ti pannakaideklarar na kas persona-non grata iti Barangay Santiago iti nasao nga ili.
Maipalagip nga immunan nga inlawlawag ni Sang Kabataan (SK) Federated President Angelo Agustin iti ili ti Solsona a kwalipikado ni Miss Aquino para iti pageant gapu ta ti ina na ket naiyanak iti Barangay Santiago.
Kuna na a basar iti requirement a nabayagen a maipatpatungpal iti pannakaiyuswat ti Miss Solsona, uray saan nga agnanaed a mismo ti kandidata iti ili ti Solsona no naipasngay ti ama wenno ama na iti lugar ket kwalipikado a makisalip iti pageant.
