LAOAG CITY – Umannugot ni Sangguniang Panlungsod Member Jason Perera ditoy siudad ti Laoag ti nagbalin a rakurak ni Presiding Officer Vice Mayor Rey Carlos Fariñas a masapol a mapakaammoanda nga agpanpanday linteg dagiti ganuat a maisayangkat ditoy siudad.
Segun kenkuana, daytoy ket kas iti masungad a pannakaisayangkat ti Balikatan Exercises iti Brgy. Lapaz no sadino ket saanda a napakaammoan maipanggep iti daytoy naindaklan nga aktibidad ditoyt siudad ti Laoag..
Inbatadna a daytoy ket tapno ammoda met laeng iti konseho dagiti parameters nga ar-aramidenda pakairamanan metten dagiti consequences a masapol a maaramid kas paset iti trabahoda iti konseho.
Inlawlawagna a masapol a mapakaammoanna nga opisial iti lokal a gobierno maipapan iti nasao nga aktibidad tapno mapakadaanda dagiti rumbeng nga addang nga ipatungpalda.
Innayonna a gagem iti sibubukel a konseho ditoy siudad ti Laoag manipod ken ni Mayor Michael Marcos Keon dagiti nasken a maammoanda pakaseknan iti maisayangkat a Balikatan Exercises inton sumaruno a lawas.
Immuna iti daytoy, inrakurak ni Mayor Keon nga adda ti maiwayat a Balikatan Exercises iti Brgy. Lapaz ditoy siudad ti Laoag no sadino inalay-ayanna dagiti umili nga awan ti mapasamak a gubat no di ket kas maysa a wagas laeng ti panagsagsagana ti pagilian no bilang adda ti riribuk a mapasamak.
