LAOAG CITY – Inlungalong ni Sangguniang Panlungsod Member Jason Perera, ti Chairman ti Committee on Peace and Order ken Committee on Laws ditoy siudad ti Laoag ti pannakaobligar dagiti amin a pasdek-negosio nga aglaklako ti Philippine National Police uniform a mangala dagitoy ti Philippine National Police Certificate of Conformity ken Distributorship.
Segun kenkuana, nasken a makaala dagiti maseknan nga aglaklako dagiti nasao a requirements sakbay a mapalubusan dagitoy nga agibunong, aglako ken agaramid ti nasao a bado.
Inbatadna a babaen iti daytoy ket ma-regulate ti panaglako kadagiti ramit nga eksklusibo laeng para kadagiti agpapaay iti Philippine National Police.
Inlawlawagna nga apaman a maaprobaran ti nailungalong nga ordinansa ket mamandar dagiti aglaklako nga agtungpal ken mangiprisentar kadagiti nadakamat a dokumento sakbay a maikkanda ti business permit manipod iti Business Permit and Licensing Office.
Mainaig iti daytoy, kalikagum ni Sangguniang Panlungsod Member Bryan Alcid nga adda ti mapagbalin nga standard vest dagiti Philippine National Police personnel tapno maammoanda ti nagdumaan ti para kadakuada ken kadagiti ordinario laeng a motorista nangruna ket mapagat-atapanda a maysa a pulis kabayatan ti panagdalyasatda iti kalsada.
Gapu iti daytoy, immanamong met ni Vice Mayor Carlos Farinas no sadino naobserbaranna a dagiti mailaklako a vest para kadagiti pulis ket isu met ti magatgatang dagiti riders wenno motorista.
Kabayatanna, naammoan a makikoordinar ni Konsehal Perara iti biang ti Philippine National Police maipapan iti nasao a banag.
