LAOAG CITY – Inpakaamo ni Konsehal Jason Perera nga adda iti naawatna nga impormasion maipaggep kadagiti establishimento ditoy Ilocos Norte nga arig na saan da nga ipapaay ti usto a karbengan dagiti Persons with Disability.
Segun kenkuana, imbes a 20% ti diskwento a maipaay kadagiti addaan ti rangkap iti bagina ket 8% laeng.
Mainaig iti daytoy, sinalusod pay ti konsehal no adda dagiti parmasia a kastoy iti ar-aramiden da kadagiti addaan ti rangkapi ti bagina.
Inlawlawag met ni Mr. Christopher King Medina, Disability Officer 4 ti PDAO ditoy ciudad ti Laoag a kasapolan nga eksklusibo laeng kadagiti addaan ti rangkap ti bagina dagiti diskwento no mapan dagitoy kadagiti restaurant, saan a mairaman wenno maibingay kadagiti kaduana.
Kabayatanna, kunana nga awan met pay ti naawat da a report maipanggep iti kastoy a reklamo ditoy ciudad ti Laoag ngem inpanamnapana ti naiget a panangkita kadagitoy.
