LAOAG CITY – Kalikagom ni Sang Panlungsod member RJ Fariñas ditoy ciudad ti Laoag a maipababa ti aldaw a panagquarantine dagiti agpositibo ti covid-19.
Kunana a no mabalin ket 10 laeng nga aldaw ti panag-isolate no mild ken asymptomatic ti pasyente idinto a no severe ken moderate ket 21 nga aldaw.
Inlawlawag na a napadasan na no kasanu ti karigat ti ag-isolate isut gapuna a no mabalin ket maiyababa ti aldaw a panag-quarantine no mild ken asymptomatic ti pasyente.
Innayon na nga ad-adda manen a marigatan dagiti inaldawan ti pagsapulan na no mapupuk ken agsardeng da nga agtrabaho iti uneg ti 21 nga aldaw.
Gapu iti daytoy, mapaayaban iti sumaruno a sesyon ti konseho da Doctor Joseph Adaya ken Dra. Lynette Formantes tapno maala met ti komento da maipanggep iti inlungalong ni Fariñas.
Kalikagom a maamoan dagiti maseknan no maipaayan latta ti sertipikasyon dagiti mild ken asymptomatic a pasyente ken no mabalin dan ti rumuar kalpasan ti 10 nga aldaw.
