LAOAG CITY – Nagpanawagan ni Konsehal Violeta Nalupta iti Philippine National Police iti ciudad ti Batac a liklikan da koma a pag-sirenen ti patrol da no awan ti respondean da nga insidente.
Inlawlawag ni Nalupta a kabayatan ti panag-walking na iti parbangon ket naimatangan na ti arigna adda ti emergency a respondean ti patrol ti pulisya iti nasao a ciudad.
Inpetteng ti konsehal nga iti parbangon ket ado paylaeng dagiti matmaturog.
Innayon na a ti kastoy nga ar-aramiden dagiti kameng ti pulisya iti ciudad ket makaalarma.
Inpetteng na pay a saan a maiparbeng a pag-sirenen ti patrol car no awan ti respondean da gapu ta amangan no ipagarop dagiti tattao a nalastog dagiti kameng ti pulisya.
Gapu iti daytoy, indasar na daytoy a pasamak iti konseho tapno ti Chairman ti Peace and Order ti makisarita iti Philippine National Police iti ciudad ti Batac.
