LAOAG CITY – Inbatad ni Sang Panlungsod Member Gian Crisostomo, ti chairman ti Committee on Laws iti ciudad ti Batac a sapulen ken adalen da a naimbag da ti ordinansa para iti pannakairehistro dagiti kurung-kurong iti nasao a ciudad.
Inlawlawag na nga adda dagiti naamoan da a nairehistro a kurung-kurong iti ciudad isut gapuna a mamati da nga adda idin ti naipasa nga ordinansa para iti daytoy nga addang.
Segun kenkuana, kalikagom da a mairehistro amin a kurung-kurung iti ciudad ti Batac gapu ta awan ti pagdumaan da iti tricycle.
Kuna na pay a no bilang madesgrasya ti kurung-kurung wenno madungpar dagiti dadakkel a lugan ket mabalin nga agbalbaliktad.
Innayon na a kaspagarigan ti driver ti kurung-kurung ket maysa a mannalon, mabalin a dakkel ti magastos da iti ospital.
Inpasingked ni Crisostomo a ti kangrunaan a gagem da iti panangadal da iti linteg para iti pannakairehistro dagiti kurung-kurung iti ciudad ket ti kinatalged dagiti agiturturong iti daytoy.
