LAOAG CITY – Inpakaammo ni Vice Mayor Jonathan De Lara iti ili ti Solsona nga inaprubaranen ti konseho ti resolusyon nga inpasa ni Konsehal Marvin Pascua.
Gagem ti resolusyon a mapalubusan ti sugal iti minatayan iti nadakamat nga ili tapno adda dagiti mapan makiandingay kadagiti nagminatay.
Segun iti bise mayor, adda laeng ti dua a kameng ti konseho ti saan a pimmabor iti resolusyon ngem majority iti konseho iti nasao nga ili ket immanamong iti daytoy.
Kuna na pay nga uray dagiti sumagmamano a kakapitan iti ili ket saan da a pabor iti resolusyon gapu ta ti kalintegan dagiti maseknan ket manayunan manen ti obligasyon da.
Nupay kasta, inbatad ni de Lara nga apaman a naan-anay a maiyimplementar ti nasao a resolusyon ket napagtutulagan da kadagiti kameng ti nailian a pulisya a no adda dagiti agminatay ket adda ti mapan agbantay tapno maliklikan ti panaggugulo.
Innayon na nga adda ti limitasyon ti nasao nga addang no sadinno a masurot ti nakaugalian a siyam nga aldaw laeng ti panangimasayag ti minatay ken saan da nga ipalubos nga adda dagiti aggapo iti sabali nga ili wenno ciudad a mapan dumayo a makisugal.
Malaksid iti daytoy, inpalgak ni de Lara a saan a mabalin nga agay-ayam dagiti mapan makiminatay ti Lucky 9 ken Pepito gapu ta dakkel ti taya na daytoy a mabalin a mangitunda pay ti possible a panagririri.
