LAOAG CITY – Nangipasa ti maysa a resolusyon iti konseho iti ili ti Solsona mainaig iti panangimbitar da ken ni Atty. Dante Bonoan, ti Provincial Chief iti National Bureau of Investigation (NBI) wenno ti mabalin a mangibagi iti ahensya tapno agatendar iti sesyon da intono Lunes, Enero 22, 2024.
Daytoy ti inbatad ni Konsehal Marvin Pascua iti ili ti Solsona.
Inlawlawag na a gagem ti panangimbitar da iti mangidadaulo iti National Bureau of Investigation ket tapno agreport iti konseho no addan ti nagdur-asan ti imbestigasyon ti ahensya kontra iti isyu a Pabahay iti ili ti Solsona.
Innayon na a kalikagom da a maamoan no anian ti nalpas ken nagpatinggaan ti National Bureau of Investigation iti panagimbestigar da iti criminal aspect ti nasao a kaso gapu ta idi paylaeng napalabas a tawen a rinugyan da.
Mainaig iti daytoy, inpakaammo ni Pascua a nalpasen iti konseho ti panagimbestigar da iti daytoy a kaso no sadinno nga adda payen ti rekomendasyon da ken naduktalan da nga adda ti innem a personalidad a rebbeng na nga agsungbat iti maipagarop a ma-anomalya a “Pabahay” iti ili ti Solsona.
Maipalagip nga adda koma ti 177 a balay a maipatakder a napondoan ti 23 a milyon a pisos no sadinno nga adda dagiti nalpas ngem naduktalan nga uray maysa ket awan ti pimmasa iti standard wenno ti technical description ti “Pabahay”.
