LAOAG CITY – Kinumpirmaran ni Sangguniang Bayan Member Sherwin Tamayo iti ili a Marcos a mayorya ti resulta ti botos iti natratar a resulosyon idi Biernes seknen ti saanen a pannakaipaay ti anyaman a proyekto ti munisipyo iti maysa a construction firm.
Kuna na nga idi damu na pay laeng ket nagsalungasingen ti kontrator ken adda pay ti naregreg nga ubing iti ub-ubraen da a rangtay iti nasao nga ili.
Segun kenni Tamayo, maamak dan ta amangan maulitan ti insidente gapu ta adda pay dagiti sumarsaruno a proyekto a poon ti panangaksyon da.
Innayon ni Tamayo a nabayagen nga isyu da ti kontraktor saan laeng iti ili da ngem ketdi intero nga Ilocos Norte.
Iti mainaig a damag, inbatad ni Tamayo a ti kinaginad ti garaw ti maysa a construction firm nga agtrabaho iti maysa a proyekto.
Daytoy ti maysa pay a rason ti nangaramidan da ti resulosyon seknan ti saanen a pannakaipaay ti proyekto ti munisipyo iti nasao nga contruction firm.
Segun kenni Tamayo, kinasarita da ti kontraktor para ti panagfull blast na a mangaramid ti proyekto iti kallabes ngem nakita nga sumagmamano laeng dagiti agtrabtrabaho.
Kuna ni Tamayo nga immanamung ti kontraktor kalpasan a nakasarita ngem kaskasdi a nagtapingga laeng iti sarita.
Iti sabali a bangir, inpakaammo ni Sangguniang Bayan Member Jerome Tamayo, miembro ti committee on infrastracture iti ili a Marcos, nga awan ti safety measure iti pagub-ubraan dagiti tao ti kontraktor.
Daytoy ket mainaig ti pannakai-ban ti kontraktor kadagiti proyekto ti munisipyo ti nasao nga ili.
Segun kenni Tamayo, maysa pay ti kinaginad ti panagtrabaho ti construction firm gapu ta nalpas da kuman ti proyekto idi Enero.
Innayon ni Tamayo nga agala pay ni Sangguniang Bayan Member Sherwin Tamayo ebidensya mainaig ti nasao nga isyu.
Kabayatanna, Inlawlawag ni Mr. Richard Noval, ti maitudtudo a kontraktor mainaig ti natratar a resulosyon para ti pannakai-ban ti construction firm iti ili a Marcos, ti alegasyon kontra kenkuana.
Daytoy ket seknan ti naginad a panagtrabaho da.
Segun kenni Noval, adda ti proyekto na iti Brgy. Valdez ken Brgy. Lydia ken admitiren na nga agexpired ti kontrata iti daytoy a bulan ngem nagkiddaw ti extension, dukomento a naggapu iti Pagasa ken nagsurat ti variation order.
Mainaig iti daytoy, Linawlawagan ni Noval ti nagbalin a saritaan da iti opisina ti mayor seknan ti pannakaituluyen ti proyekto.
Inbatad na a pudno nga adda ti nagsaritaan nga ituluy da ti proyekto iti naituding a petsa ngem nairna a nakitaripnong ti municipal engineer ti Marcos idiay siudad ti Baguio rason a saan a naituloy gapu ta posible nga agbaliw ti pundasyon ti proyekto.
Innayon ni Noval nga adda pay dagiti inaramid da a saan a karaman iti program work ti proyekto ken nairefer iti municipal engineer dagitoy.
Plano ti kontraktor ti makidayalogo iti lokal a gobyerno ti ili a Marcos kangrunaan iti konseho ken ti municipal engineer tapno malawlawagan ti isyu.
Saan a kayaten ni Noval a dumakkel pay daytoy nga isyu kalpasan ti panangtratar ti konseho ti nasao nga ili ti pannakaiban na kadagiti proyekto ti munisipyo.
Naibutaktak pay ni Noval nga adda ti dua a porsiento nga itited na kenni Sangguniang Bayan Member Sherwin Tamayo idi nakatugaw a Bise Mayor kas bukod na.
