LAOAG CITY – Naawaten ti Sangguniang Panlalawigan ken iti opisina ti Bise Gobernador ti kopya mainaig iti panagapela ni Mayor Joseph De Lara iti naipataw a preventive suspension.
Basar iti Sangguniang Panlalawigan, nagapela ni Mayor De Lara iti Malacañang wenno iti opisina ni Presidente Rodrigo Duterte babaen iti panangipasa na ti Memorandum of Respondent Apellant idi pay Mayo 31 iti agdama a tawen.
Malaksid iti opisina ti Bise Gobernador ken ti Sangguniang Panlalawigan ket naipakaammo pay daytoy iti opisina ti Gobernador a nangilanadan da a saan a rumbeng a masuspenso ti nasao Mayor gapu iti agdama a situasion gubuay ti pandemiya.
Nupay kasta, awan met pay ti nainayon wenno kasurot na a kopya ti desision wenno takder ti Malacañang seknan iti nasao a banag ken ti suspenso ket naiyimplementar itay kallabes.
Maipalagip a ni Mayor De Lara ket napatawan ti preventive suspension iti uneg ti 60 nga aldaw gapu iti kaso administrabo a sangsangoen na a Dereliction of Duty ken Conduct Prejudicial Public Interest a daytoy ket inpila dagiti innem a konsehal iti ili ti Solsona.
