LAOAG CITY – Inbasura ti Constitutional Court iti South Korea ti pannaka-impeach ni Prime Minister Han Duck-soo isut gapuna a naisubli daytoy kas acting presidente iti nasao a pagilian.
Nagserbi ni Han kas acting leader idi Disyembre iti napalabas a tawen kalpasan a nasuspenso manipod iti trabaho na ken naimpeach ni President Yoon Suk Yeol babaen iti parliamento gapu iti panangideklarar na ti apagbiit a martial law.
Nupay kasta, nagpaot laeng iti dua a lawas iti posisyon ni Han kalpasa a nagbotos dagiti agpanpanday linteg para iti pannaka-impeach na met.
Sipud idi ket nagserbi ni deputy prime minister Choi Sang-mok kas mangidaulo paylaeng iti South Korea.
Kabayatanna, idi laeng kalman ket nagbotos dagiti pito nga huwes a maibasura ti impeachment kontra ken ni Han idinto a maysa kadakuada ti nangkontra iti daytoy nga addang.
