LAOAG CITY – Inbilin ti Makati Regional Trial Court-Branch 147 ti pananglapped wenno Asset Preservation Order kadagiti sanikua ken bank accounts ni Kingdom of Jesus Christ (KOJC) founder Pastor Apollo Quiboloy a sumangsango kadagiti nagduduma a kaso.
Basar iti 12 a panid a pammilin, sakupen daytoy ti 12 a bank accounts, 37 a real properties, 25 a lugan a pakairamanan ti 2 a fire trucks, maysa a fuel tanker, maysa a Cessna aircraft nga agpapada a nakainagan ken ni Quiboloy ken ti The Executive Pastor ti Kingdom of Jesus Christ.
Nakakita ti umdas a pagibasaran ti korte tapno isyuan ti preservation order dagiti bank accounts ken sanikua ni Quiboloy ken The Executive Pastor ti The Executive Pastor ti Kingdom of Jesus Christ.
Iti baet a nangidatag dagiti testigo a mangipaneknek kadagiti tithes ken dagiti love offerings ni Quiboloy ken Kingdom of Jesus Christ a naawatda ket saan a nakaiprisentar ti pammaneknek a mangsupsuporta iti daytoy.
Basar iti korte, ti pammilin ket inaramid tapno saan a mailemmeng, maiyakar wenno mailako dagiti sanikua kabayatan ti panagdengngeg ti kaso.
Inlawlawag ti korte a ti Asset Preservation Order ket addang nga agturong iti civil forfeiture wenno panangibabawi ti gobierno kadagiti sanikua ken saan a kayatna a saoen nga insigida a kumpiskaren dagitoy ngem maipadalan dagitoy iti hurisdiksion ti korte.
