LAOAG CITY – Sumango iti kaso ken pannakaibalud ti asawa a lalaki no ipilitna a makinaig iti asawana nupay saanna a kayat.
Inbatad ni Atty. Ma. Soledad Mawis, Dean ti Lyceum of the Philippines University College of Law, no pwersaen ti asawa a lalaki ti bagina iti misisna ket mabalin daytoy a makasoan ti marital rape ken panaglabsing ti Anti-Violence Against Women and Their Children Act of 2004.
Inpetteng ni Mawis nga iti babaen ti linteg, saan a mabalin a pwersaen ti asawa a babai no saanna a kayat ti makinaig.
Kunana a ti babai ket saan a kukua ti lalaki ken adda ti karebbengan dagiti babbai nga agkedked.
Mainaig iti daytoy, segun ken ni Atty. Mawis a nagbalin a ruling ti Supreme Court maipapan iti marital rape iti kaso ti People of the Philippines kontra ken ni Edgar Jumawan no sadinno naideklara a guilty ti asawa a lalaki gapu iti panangrames iti asawana a babai ti namindua a daras.
Maipalagip a nagbalin a nabara a napagsasaritaan ti marital rape kalpasan a sinaludsod ni Senador Robin Padilla iti Senate hearing ti mabigbigbig a family lawyer a ni Atty. Lorna Kapunan no mabalin nga ipilit ti asawa a lalaki ti bagina iti baet nga awan iti mood ti misis.
Kuna ni Kapunan a saan nga obligasion ti misis iti sexual intercourse a kalikagum ti mister.
Kinanunungan ni Mawis ti rakurak ni Kapunan ken inpettengna kas maysa a tao ket adda ti karebbengan ti misis nga agkedked iti sex.
Kabayatanna, dimmawat met ti panagpadispensar ni Padilla kadagiti nasaktanna gapu kadagiti nagbalin a rakurakna.
