LAOAG CITY – Inaprobaranen ti Korte Suprema dagiti pagannurotan iti panagusar ti Filipino Sign Language (FSL) kadagiti amin a panangtingiting kas addang tapno masigurado ti patas nga access iti hustisia kadagiti adda ti rangkap ti bagina iti panagsarita ken panagdengngeg.
Basar iti pammilin, mandatory ken kualipikado dagiti accredited a Filipino Sign Language interpreters tapno asistaran dagiti akusado nga adda ti rangkap ti bagina iti panagsarita ken panagdengngeg pakairamanan dagiti saksi nga addaan ti kapada a sakit.
Mainaig iti daytoy, mapalubosan pay ti on-site ken remote interpreting a protektado met ti linteg tapno maprotehiran ti confidentiality ken reliability ti interpretations.
Nadakamat a ti addang ket kagiddan ti maipatpatungpal a Filipino Sign Language Act wenno Republic Act No. 11106 ken panangsurot iti United Nations Convention on the Rights of Persons with Disabilities (UNCRPD).
Kabayatanna, agbalin nga epektibo dagiti pagalagadan no bilang naipablaaken daytoy iti Official Gazette wenno dua a pangiwarnakan ti national circulation.
