LAOAG CITY – Inbasura ti Korte Suprema ti petisyon kontra ken ni Senador Francis Escudero a mangkidkiddaw a mapaawan bileg ti ruling ti Political Finance and Affairs Department ti Commission on Elections mainaig iti campaign donation a naawat ti senador idi 2022 elections.
Basar iti resolusyon ti Korte Suprema a napetsaan ti Hunyo 3, 2026, naibasura ti petisyon ti pribado nga indibidwal a ni John Barry Tayam gapu ta saan nga usto ti legal a remedyo nga inpila na.
Namonganay ti kaso iti nagbalin a desisyon ti Political Finance and Affairs Department nga isardeng ti imbestigasyon kontra kada Escudero ken Lawrene Lubiano, a presidente ti Centerways Construction and Development Incorporated, gapu iti kinakurang ti ebidensiya iti maipagarop a panaglabsing iti Section 95 ti Omnibus Election Code.
Immunan nga inadmitir ni Escudero a nakaawat ti P30 milyon a pisos a donasyon manipod ken ni Lubiano, ngem inlawlawag na nga awan ti nagbalin a papel na iti panangala ti kompanya kadagiti flood control project ti gobierno.
Segun iti Political Finance and Affairs Department, naisina ti legal a personalidad ni Lubiano iti Centerways ken awan ti ebidensiya a naggapo ti pondo iti kompanya ti nagbalin a donasyon na.
Inpetteng met ni Tayam a para kenkuana, saan a mabalin a pagsinaan da Lubiano ken Centerways.
Innayon na a saan a mabalin nga ibaga a personal a kapasidad laeng ti nagbalin a donasyon gapu ta nabayagen a kontratista ti gobierno ni Lubiano, ken ti isyu ket agkasapulan ti panangilawlawag ti Korte Suprema.
