LAOAG CITY – Inbilin ti Korte Suprema nga agkomento ti Senado, House of Representatives ken dadduma pay a respondents iti petision nga inpasa kontra iti impeachment ni Vice President Sara Duterte.
Basar iti Korte Suprema, daytoy ket kalpasan a talantanen iti nagbalin nga En Banc session dagiti petision nga inpila da Atty. Israelito Torreon ken Vice President Sara.
Inraman payen dagiti petision idinto nga inikkan ti 10 nga aldaw ti respondents a mangipaay ti komentoda maipanggep iti petision.
Kukwestionaren dagitoy ti constitutionality wenno maiyataday iti Konstitusion ti impeachment proceedings kontra iti Bise Presidente a taltalantanen ti House Committee on Justice.
Kidkiddawen ti kampo ni Vice President Sara a mangiparuk-at ti temporary restraining order ti Korte Suprema kontra iti proseso ti impeachment, isardeng ti aniaman nga addang nga adda ti pakainaiganna ditoy ken ideklarar nga unconstitutional ti dua nga impeachment case a naipila kenkuana iti Kamara de Representantes.
