LAOAG CITY – Inbilin ti Korte Suprema dagiti sumagmamano nga opisial ti gobierno a sungbatan ti petision nga inpasa iti kallabes tapno maisubli ditoy pagilian ni dati a Presidente Rodrigo Roa Duterte.
Iti naisayangkat a sesyon ti Supreme Court En Banc, nangiyisyu daytoy ti pakaammo tapno ibilin dagiti respondents a mangipaay ti sungbat mainaig iti ‘writ of habeas corpus para iti dati a Presidente.
Pammilin ti Korte Suprema a mangisubmitir ti ‘memorandum’ dagitoy iti petision dagiti sumagmamano a nangangato nga opisial ti gobierno iti uneg ti 30 nga aldaw.
Segun iti korte a nasken nga ikonsiderar no ti nasao a kontrobersial ket maibilang a ‘moot’ ken maduktalan ti papel daytoy nangruna iti agtultuloy a panagdengngeg ti kaso iti International Criminal Court.
Karaman kadagiti paspasungbaten ti Korte Suprema ket isuda dati nga Executive Secretary Lucas Bersamin, Department of the Interior and Local Government Secretary Jonvic Remulla, Ombudsman Jesus Remulla, dati a Philippine National Police chief Francisco Marbil, dati a Philippine National Police- Criminal Investigation and Detection Group Director Nicolas Torre III, dati a Solicitor General Menardo Guevarra, dati a Foreign Affairs Secretary Enrique Manalo ken dadduma pay.
Maipalagip a nangipasa ti petision idi Marso da Kitty Duterte, Davao City Mayor Baste Duterte ken Davao City Rep. Pulong Duterte iti Korte Suprema tapno maiyawid ni dati a Presidente Duterte nga agsubli ditoy pagilian.
