LAOAG CITY – Natay ti maysa kadagiti nakalugan iti kotse kalpasan ti panagdinnungparda iti elf truck iti Brgy. Lang-Ayan iti ili ti Currimao.
Nabigbig ti biktima a ni Jayson Ross Alonzo y Tabisula, agtawen ti 32, awanan asawa, residente ti Brgy. Quiling Sur iti siudad ti Batac.
Nabigbig met ti driver ti kotse a ni Pat. John Mark Dela Cruz y Seguritan, agtawen ti 32 years old, pulis a naidesignar iti HPG Cebu City idinto a ti nangiturong ti Isuzu Elf Truck a ni Felix III Geronimo y Ibasco, agtawen ti 35, naasawaan, residente ti Camachilihan, Bustos, Bulacan ken ti kaduana a ni Pepito Reyes y Ortega, agtawen ti 51, naasawaan, residente ti Brgy. Buisan, Bustos, Bulacan.
Basar iti Currimao Municipal Police Station, kabayatan a dumaldalyasat ti kotse nga agturong nga agpa-abagatan ket maipagarup nga imm-overtake kadagiti sarsarunnoenna a lugan.
Nupay kasta, saanna a naripar ti kotse ti elf truck a sumungsungad kadakuada a nangitunda ti panagdinnungparda.
Kabayatanna, naitaray dagiti amin a maseknan a nakalugan kadagiti dua a lugan iti Mariano Marcos Memorial Hospital and Medical Center iti siudad ti Batac para iti naan-anay a pannakataminda ngem naideklara a pimmusay ti kadua ti driver ti kotse babaen ken ni Dr. Addielou Fidelfio Abad, Municipal Health Officer iti ili ti Currimao.
