LAOAG CITY – Nadadael ti maysa a paset ti alad ti Northwestern University a sakop ti Brgy. Bengcag ditoy siudad ti Laoag kalpasan a naidungpar ti kotse nga inturong ti agtawen ti 18 a baro ken residente iti Brgy. Camanggaan ditoy siudad.
Inbatad ni Pol. Staff Sgt. Marc Briones, ti imbestigador iti PNP-traffic division nga agturong iti daya ti kotse idi ta kellaat a napukawan ti kontrol iti manibela.
Kuna na a gapu iti daytoy, naidungpar iti alad ti nasao nga unibersidad ken karaman a nadadael ti tubo ti danom.
Kabayatanna, inpakaammo ni Briones a saan a nagsagaba iti aniaman a sugat ti driver pakairamanan ti nobya na a kadua na iti behikulo.
Apaman a masisursurat ti damag ket nagtalinaed iti kustodyar ti otoridad dagiti agkarelasyon agraman ti nagluganan da a kotse.
