LAOAG CITY – Maysa a Nissan Skyline R34 nga addaan ti 43,860 LED lights ti pormal a binigbig ti Guinness World Records kas “most LED lights on a car.”
Inabakna ti dati a rekord daytoy a 37,671 LED lights idi 2020 idiay Dubai.
Kukua daytoy ni Alix Wilding manipud idiay United Kingdom nga inurnos ken binaliwanna ti lugan manipud iti naperperdi a kondision.
Malaksid iti panagsukat ti maris ken panangipakita ti patterns, kabaelanna pay nga ipakita ti Guinness World Records logo iti hood.
Nupay kasta, saan daytoy a mabalin a patarayen iti kalsada gapu ta naabbongan ti rear windscreen-na.
Inbatad ni Alix nga agpapan iti daytoy a gundaway ket saan pay a mamati gapu ta agbuybuya laeng isuna idi ti Record Breakers ngem saanna nga inpagarup nga agbalin daytoy a record holder iti masangoanan.
