LAOAG CITY – Inarado ti maysa a kotse iti 22 a kongreto a barikada iti bypass road a sakupen ti Brgy. Tangid ditoy ciudad ti Laoag.
Binigbig ni Police staff sergeant Artemio Magaoay Jr., Duty investigator iti Philippine National Police-Traffic Division ditoy ciudad ti Laoag ti nangiturong iti kotse a ni Carl John Aerrone Purisima, agtawen ti 21, estudyante ken residente iti Brgy 17, Pannaratan iti ili ti Paoay.
Basar iti imbestigasyon dagiti otoridad, kabayatan ti panagpapa-abagatan ti kotse iti oras ti ala-1:50 itay parbangon iti bypass road idi naawanan ti kontrol a nangitunda ti pannakadungpar na dagiti barikada.
Inpakaammo ni Magaoay a ni Purisima ket nakainom ti arak ken napaspas ti panagpataray na.
Gapo iti napasamak, nadadael iti sangwanan ti kotse nga arigna nagudwa, naikkat dagiti ligay ken naipurwak iti makina ti lugan, sumagmamano a metro ti kaadayo na manipod iti nakapasamakan ti aksidente.
Kabayatanna, naitaray iti biktima iti Governor Roque Ablan Sr. Memorial Hospital (GRASMH) ditoy ciudad ti Laoag para iti naan-anay a pannakataming na kalpasan a nagsaba ti sugat iti ulo na ngem nakarwar met laeng a dagus.
Mainaig iti, inbatad ni Magaoay a naikkan iti citation ticket ni Purisima nga agbalor iti 5,000 gapo iti reckless driving ken driving under the influence of liquor.
Malaksid iti daytoy, kuna ni Magaoay a masapol a bayadan ni Purisima dagiti nadadael na a barikada iti nadakamat a lugar.
