LAOAG CITY – Naminpinsan a dimmapo ti maysa a kubo-kubo a kukua ti pamilya Agustin iti Barangay 23, San Cecilia iti ili ti San Nicolas.
Daytoy ti inbatad ni FO3 Redentor Guillermo, ti ground commander ti BFP iti ili ti San Nicolas a napan nagresponde iti napasamak nga uram.
Inlawlawag ni Guillermo a basar iti inisyal nga imbestigasyon da, nagpuur ti nasao a pamilya iti sigud a pagpupuuran da.
Nupay kasta, gapu iti kinapigsa ti angin ket nagkayamkam ti apoy agingga iti kubo-kubo.
Inbatad ni Guillermo a karaman a nauram ket ti maysa a telebisyon ken bisikleta ti babai nga adda a mismo iti uneg ti kubo-kubo.
Agtultuloy ti imbestigasyon ti BFP tapno maamoan ti pakabuklan ti nadadael iti napasamak nga uram.
