LAOAG CITY – Kinumpirmaran ni Barangay kagawad Marciano Baclagan iti Barangay Naglicuan iti Pasuquin, Ilocos Norte nga adda ti inparuk-at da a gunguna para ti siasinno man a makaitudo ti akin-aramid ti pannakauram ti maysa a kubo-kubo nga ayan dagiti kagamitan a pagkalap iti nasao a barangay.
Karaman kadagiti nauram ket ti bangka de motor, daklis ken dadduma pay a kagamitan a pagkalap a mapatta-patta nga agbalor amin ti nasurok a 250 ribo a pisos.
Segun ken ni Baclagan, dagiti nasao a kagamitan ket naited ti maysa a grupo nga addaan iti 10 a miembro tapno adda ti usaren da nga agkalap, pakairmananen dagiti annak na.
Gapu ti napasamak ket nagkari ti maysa kadagiti financier dagiti nasao a kagamitan a nakasagana a mangipaay ti 50 ribo a pisos a gunguna para ti makaited ti impormasyon no siasinno ti adda ti likudan ti pannakapuur ti kubo-kubo nga ayan dagiti nasao a kagamitan a pagkalap.
Inpasingked ni Baclagan nga awan ti ammo da a gumurgura kadakuada isut gapuna nga awan ti pamal-palatpatan da no siasinno ti akin-aramid ti daytoy.
