LAOAG CITY – Kinumpirmaran ni Police Staff Sergeant Rohn Paul Cardona, ti Investigator On Case ti Philippine National Police iti ili ti Bacarra a nagbaliktad ti maysa a kurong-kurong a nagluganan ti maysa nga ama ken ti anakna nga ubing a naipurwak iti kalsada gapu iti napasamak a Self Vehicular Traffic Incident iti paset ti Brgy. 32, Corocor iti nasao nga ili.
Segun kenkuana, nabigbig ti nangiturong ti kurong-kurong a ni Elmer Lebantino, agtawen ti 37, addaan ti live in partner idinto a nabigbig met ti ubing a lalaki nga agtawen ti 5 ken residente dagitoy iti Brgy. 29, Pasngal iti ili ti Bacarra.
Inbatadna a bayat a dumaldalyasat ti kurong-kurong nga agturong nga agpa-Abagatan a direksion ket dita a kellaat a naawanan ti kontrol ti manibela a nangitunda ti panagbaliktad ti nasao a lugan.
Inlawlawagna a gapu iti daytoy ket nagsagaba ti sugat iti nagdumaduma a paset ti bagi ti ama ken ti anakna gapu iti impact ti pannakadesgrasia dagitoy.
No pay kasta, kunana a saan met a naitarayen iti ospital dagiti agama ngem nataming latta dagitoy babaen iti first aid ti Municipal Health Office ti Bacarra.
Kuna ni Police Staff Sergeant Cardona a maibilang nga Accident Prone Area ti nakapasamakan ti desgrasia gapu ta agkurba ti kalsada a pagdalyasatan dagiti motorista.
Innayonna nga adda ti impluwensiya ti nasanger ti ama banag nga isu ti rumrumuar a makaigapu iti pannakadesgrasia dagiti agama.
