LAOAG CITY – Nagdinnungpar ti maysa a kotse ken kurong-kurong iti Brgy. 5 ditoy Siudad ti Laoag.
Segun ken ni PSSgt. Artemio Magaoay Jr., Duty Investigator ti Philippine National Police Laoag Traffic Division, nabigbig ti driver ti kotse a Honda Civic a ni Clark Kyle Ericta y Gagarin, agtawen ti 25, awanan asawa ken residente ti Brgy. 9, Lubnac iti ili ti Vinta idinto a ti nangiturong ti kurong-kurong ket ni Mark Levy Val y Dadis, agtawen ti 23, awanan asawa ken residente ti Brgy. Poblacion 1 iti ili ti Currimao.
Inbatad na a basar iti imbestigasion, bayat a dumaldalyasat ti kotse nga agpa-abagatan ket kellaat a dimmungpar ti nakakurong-kurong nga agpa-daya.
Kunana a gapu iti impact ti desgrasia ket naipurwak dagiti dua a nakalugan iti kurong-kurong rason a nagsagaba dagitoy ti sugat iti nagduduma a paset ti bagi da idinto a saan met a naan-ano ti driver ti kotse.
Kunana a naitaray dagiti maseknan a biktima iti Governor Roque Ablan Sr Memorial Hospital para iti naan-anay a pannakataming dagitoy.
Nupay kasta, inlawlawag na a saan a nagbayag ket nakaruar met laeng dagiti biktima ti desgrasia.
Innayonn a a nagsasarita metten dagiti agsinnungbangir a partido pakaseknan iti napasamak a desgrasia.
