LAOAG CITY – Nadungpar ti maysa a kurong-kurong ti maysa a motorsiklo idiay Brgy. Suyo iti ili a Dingras.
Nabigbig ti driver ti motorsiklo a ni Romulo Ballesteros, 33, naasawaan, awanan ti lisensya ken ti lubbon na a ni Norbel Ganniban, 48, naasawaan, agpada a construction workers ken residente ti Brgy. Lanas iti nadakamat met laeng nga ili.
Ti met driver ti kurong-kurong ket ni Rosevelt Sarmiento, 43, naasawaan, mannalon, awanan ti lisensia ken residente ti Brgy. Suyo iti nasao met laeng nga ili.
Basar iti imbestigasion ti PNP-Dingras, dumaldalyasat dagiti dua a lugan iti agpada a linya idi kellaat a nag U-Turn ti kurong-kurong.
Rumrumuar a saan a napakadaan ti motorsiklo ti kellaat lattan a panagU-turn ti sarsarunwen na a kurong-kurong a nangitunda iti desgrasya.
Gapo iti daytoy, nagsagaba ti sugat iti nagduduma a paset ti bagi dagiti biktima ken naitaray da iti Dingras District Hospital ngem naiyakar da iti Mariano Marcos Memorial Hospital and Medical Center idiay ciudad ti Batac.
Naammoan a saan a nakainom ti arak dagiti driver ken nakasuot ti helmet dagiti nakalugan ti motorsiklo.
Kabayatanna, ur-urayen ti PNP-Dingras a makaruar iti ospital dagiti maseknan iti nasao nga aksidente para iti pannakaimbestigar da.
