LAOAG CITY – Nasapgod ti maysa nga SUV ti kurong-kurong iti paset ti Rizal Street corner Vintar Road a sakupen iti Brgy. 23 ditoy Siudad ti Laoag.
Segun ken ni Police Staff Sergeant Alexson Rosal ti Duty Desk Officer ti Philippine National Police Laoag Traffic Division, nabigbig ti driver ti SUV a Ford Territory a ni Ramon Alejandro Formantes, agtawen ti 60 ken residente ti Brgy. 26 ditoy Siudad idinto a ti nangiturong ti kurong-kurong a TMX 155 ket maysa a menor de edad nga agtawen ti 17 ken residente ti Brgy. 53, Rioeng ditoy Siudad ken ti nabigbig ti kaduana a ni Mark Anthony Viado, agtawen ti 21 ken residente ti Brgy. 56-B, Bacsil ditoy Siudad ti Laoag.
Inbatadna a basar iti imbestigasionda ken ti naalada a kopya ti dash cam ti lugan a sumarsaruno iti SUV ket bayat a nakasardeng ti kurong-kurong nga agpa-Abagatan ket dita a nasapgod ti SUV nga agpa-Amianan.
Gapu iti daytoy, kunana a nadadael ti sumagmamano a parte dagiti dua a lugan gapu iti panagsinnapgud dagiti behikulo idinto a saan met a naan-ano dagiti maseknan a driver ken ti maysa pay a nakalugan iti kurong-kurong.
Innayonna nga awan met ti impluwensiya ti nasanger dagiti dua a driver idi napasamak ti desgrasia.
Kabayatanna, naammoan a naiyiskedyul inton Biernes ti panagsasarita dagiti agsinnungbangir a partido.
