LAOAG CITY – Naitapwak iti igid ti kalsada ti maysa a kurung-kurung a nagkarga ti 18 a gallon ti purified water iti paset ti Barangay Suyo, Dingras, Ilocos Norte.
Nabigbig ti driver ti kurung-kurong a ni Ryan dela Cruz idinto a ti pahinante na ket ni Reynante Manibog, agpada dagitoy a residente iti Barangay 16 iti ili ti Sarrat.
Naamoan a mapan koma agideliver ti danom dagiti biktima iti Barangay Suyo iti ili ti Dingras idi napasamak ti insidente.
Segun ken ni Manibog, kabayatan ti panagdaldalyasat da ket natukkol ti chassis ti motor a mamagkamang iti sidecar.
Gapu iti daytoy ket saanen a maiturong ni dela Cruz ti kurung-kurong a nagresulta ti pannakaitapwak da iti igid ti kalsada ken naiwarwara dagiti mapanda koma ideliver a danom.
Naipan ni dela Cruz iti ospital gapu ta angalen na ti sakit iti bukot na idinto a saan a naan-ano ni Manibog.
