LAOAG CITY – Nagbalin nga emosyonal ni Mr. Alex Edra iti Barangay 23 iti ili ti Sarrat gapu iti nakaro a luksaw na kalpasan a pinuuran ti maysa nga indibidual ti kurung-kurung ken motorsiklo na.
Inbatad ni Edra nga agarop alas-diyes ti rabii iti kalman idi riingen ti kaanakan na a maur-uram dagiti lugan na.
Segun ken ni Edra, ti palawag kenkuana ti kaanakan na ket nakita na ti maysa nga indibidual a napan nangguyud iti kurung-kurung ken motorsiklo na no sadinno nga inturong na dagitoy iti taltalon nga isu ti nangpuuran na.
Kuna na a possible a ginaburan ti suspek kadagiti usang dagiti lugan kalpasan na ket sinilmutan na ti apoy.
Inpalgak ni Edra a ti maitudtudo a suspek ket personal nga am-ammo da gapu ta nagnaed ti pamilya na iti asideg da iti kallabes ngem immakaren dagitoy ti pagnaedan.
Inpetteng na nga awan ti ammo na a basolna iti suspek isut gapuna a saanna a mautub a panunuten no apay a kastoy ti inaramid na kenkuana.
Inpaganetget na a nasakit ti nakem na gapu ta nabayag na a binakir dagiti lugan na ngem kastoy pay ti nagbanagan da.
Innayon na a saan dan a nasebseban pay ti apoy gapu ta karigat ti danom iti lugar da ken ti immuna a nangitawagan dagiti karruba na ket iti Philipine National Police.
Iti agdama, agtultuloy ti imbestigasyon ti Bureau of Fire Protection mainaig iti nasao a pasamak.
