LAOAG CITY – Pabor ni Engr. Fehlander Madriaga, dati a director iti Department of Science and Technology ditoy probinsya iti nagbalin a panawagan ni Presidente Ferdinand “Bongbong” Marcos Jr. a mangidiaya ti nasao a departmento ti ad-ado nga scholarship.
Nupay kasta, kuna ni Madriaga a masapol a ma-screen latta a naimbag dagiti agaplikar no sadinno a rumbeng a dagiti makastrek nga scholar ti nasao a departamento ket nasisirib.
Inbatad na a dagiti scholar iti Department of Science and Technology ket masapol nga addaan ti average grade a saan a nababbaba ngem 86.
Inlawlawag na a no adda dagiti bumaba ti grado na apaman a maawat da kas ascholarship ti nasao a departamento ket saan da a dagus a maikkat no di ket maballaagan dagitoy.
Innayon na nga uray dagiti benepisyo a para kadagiti maseknan ket saan paylaeng a maited agingga a saan mabaliwan ti maseknan ti grado na.
Mainaig iti daytoy, kuna ni Engr. Madriaga a manayunan koma pay ti kurso a masakopan iti scholarship program iti Department of Science and Technology.
Karaman kadagiti kalikagom ti dati a director ti departamento a mainayun a kurso ket dagiti health sciences kas ti nursing, physical therapy ken dadduma pay nga adda ti pakainaigan na iti sciences.
Kabayatanna, agtalek ni Madriaga nga uray kasanu kaado dagiti agbalin nga scholar ti Department of Science and Technology ket awan ti problema iti pondo gapu ta ado dagiti mangipapaay.
Inpakaammo na a ti maysa a kangrunaan a paggapgapwan ti pondo para kadagiti scholarship ti departamento ket ti Philippine Amusement and Gaming Corporation (PAGCOR).
