LAOAG CITY – Plano ni Dallas Mavericks guard Kyrie Irving nga iripresentar ti Australia nga isu ti nakaiyanakanna kadagiti international competition.
Ti nine-time NBA All-Star ket nagballigi ti balitok a medalya iti Team USA idi 2016 Olympics iti Rio de Janeiro.
Addaan daytoy ti dual citizenship a maysa nga American ken Australian.
Naipasngay isuna iti Melbourne idi 1992 idinto ti ama daytoy a ni Drederick ket nagay-ayam iti Bulleen Bullets iti South East Australian Basketball League.
Adda dagiti sumagmamano a pannubok a sangoen ni Irving gapu ta basar iti FIBA ruling ket nasken a ti maysa nga umaayam ket saan pay a nakaiprisentar ti maysa a pagilian kadagiti international competition.
Iti napalabas a tawen, napaay ni Klay Thompson nga agay-ayam iti Bahamas, ti pagilian a nakaipasngayan ti amana gapu iti ruling ti FIBA.
