LAOAG CITY – Inrakurak ti state weather bureau nga opisyalen a nalpas ti La Niña a senyales ti panagsublin ti neutral climate conditions.
Basar iti kabarwanan a climate monitoring ti bureau, ti sea surface temperatures iti central ken equatorial Pacific ket nagsublin iti El Niño-Southern Oscillation wenno ENSO-neutral conditions a kayatna a sawen ket awanen ti La Niña wenno El Niño iti agdama.
Patta-pattaen ti bureau nga iti panagngudon ti La Niña, maaddaan ti panagbalbaliw iti panawen, karaman ti panagbaba ti above-normal rainfall iti sumagmamano a paset ti Luzon, Bicol, Eastern Visayas ken northeastern Mindanao.
Naiyakar met ti ENSO Alert and Warning System iti “inactive” a kayatna a sawen ket awan ti namnamaen a mabukel a La Niña wenno El Niño iti sumaruno a tallo a bolan.
Namnamaen met nga agpannuray ti neutral conditions agingga iti Setyembre, Oktubre ken Nobiyembre ti agdama a tawen.
Kalpasan ti panagngudo ti La Niña, agtultuloy ti panagballaag ti state weather bureau iti publiko iti agtultuloy a warm ken dry season tapno maliklikan ti heat stress ken dadduma pay a risgo iti salun-at nga itunda ti nabara a panawen.
