LAOAG CITY – Nagsagaba ti sugat iti nagduduma a paset ti bagi ti maysa a lalaki a nangiturong ti motorsiklo kalpasan a naidungpar iti maysa nga SUV iti paset ti Provincial Road ti Brgy. 21, Libtong iti ili ti Bacarra.
Segun ken ni PCpl. Nathaniel Lumang, Duty Desk Officer ti Philippine National Police iti ili ti Bacarra, nabigbig ti driver ti motorsiklo a Yamaha Mio 125 a ni Gian Paul Mamba y Andres, agtawen ti 31, awanan asawa, laborer ken residente ti nasao a Barangay.
Kabayatanna, kuna na a ti met nangiturong ti SUV nga Isuzu DMAX nga agmaris ti puraw nga addaan ti plate number NES 8910 ket ni Henry Bolo y Dugay, agtawen ti 66, naasawaan, retirado a seaman ken residente iti Brgy. 1416 Vicente G. Cruz St. idiay Sampaloc, Manila.
Inbatadna a basar iti naisayangkat nga imbestigasion, kabayatan a nakasardeng iti provincial road ti SUV a nakaturong iti amianan ket dita a kellaat a dinungpar nakamotorsiklo nga agturong iti kapada a direksion.
Gapu iti daytoy, kunana a nagsagaba ti sugat iti nagdumaduma a paset ti bagi ti driver ti motorsiklo ken naitaray daytoy iti Governor Roque Ablan Sr Memorial Hospital para iti naan-anay a pannakatamingna idinto a saan met a naan-ano ti nangiturong ti SUV.
Inlawlawagna a gapu iti impact ti desgrasia ket napitpit ken naparpar ti akinlikod a paset ti SUV idinto a nadadael met ti akinsango a paset ti motorsiklo.
Mainaig iti daytoy, inpakaammo ni Lumang a manamnama ti pangasasarita dagiti maseknan a driver tapno mapagtutulagan ti napasamak a desgrasia.
Naamoan nga adda iti impluwensiya ti nasanger ti driver ti motorsiklo rason a napasamak ti desgrasya.
