LAOAG CITY – Pimmusay ti maysa a lalaki kalpasan a napaltopaltogan iti Brgy. Garreta iti ili ti Badoc.
Segun iti Philippine National Police iti nasao nga ili, nabigbig ti biktima a ni Jojo Delos Santos y Talibugen, naasawaan, maysa a laborer ken residente iti Brgy. Uguis iti ili ti Nueva Era.
Basar iti imbestigasion, kabayatan a dumaldalyasat ti biktima a nakalugan iti motorsiklo nga agturong nga agpa-amianan iti nadakamat a barangay ket kellaat daytoy a pinaltopaltogan dagiti saan pay a nabigbig a suspek.
Inbatad dagiti otoridad a napan nagresponde dagiti kameng ti Rural Health Unit iti insidente ken dagusda nga intaray ti biktima iti ospital ngem naideklara a dead on arrival gapu kadagiti sinagabana a tama ti bala ti paltog iti nagduduma a paset ti bagina.
Inlawlawagna a dagus met a naisayangkat ti hot pursuit operation tapno insigida a makemmeg dagiti suspek.
Iti agdama, agtultuloy pay laeng ti isaysayangkat nga imbestigasion dagiti pannakabagi iti linteg tapno maammoan iti naan-anay a detalye ti nakaam-ames a pasamak.
