LAOAG CITY – Binabalaw ni Sen. Panfilo “Ping” M. Lacson ti sumagmamano a mapagduaduaan a lump sum appropriations para kadagiti proyekto ti imprastruktura iti babaen ti maysa nga ahensia ti gobierno iti naisingasing a P7.2 trillion a National Expenditure Program (NEP) wenno national budget para iti 2027.
Kinuna ni Lacson a mabalin a pormal a kuestionarenna ti isyu bayat ti briefing ti Development Budget Coordination Committee (DBCC), a naikeddeng a mangrugi inton Agosto 27.
Mainaig iti daytoy, rinugianen ni Lacson ken dagiti staff-na ti naan-anay a panangrepaso iti National Expenditure Program (NEP) kalpasan a naipatulod daytoy iti Kongreso idi napan a lawas. Kinunana a repasuenda pay ti National Expenditure Program (NEP) para kadagiti espesial a probision a mabalin nga usaren a mangliklik kadagiti limitasion iti unprogrammed appropriations.
Kabayatanna, dinakamat pay ni Lacson ti napalabas a General Appropriations Act (GAA) no sadinno a nagnayon ti bicameral conference committee ti dua a “highly questionable, even unconstitutional Special Provisions.” Karaman kadagitoy a probision ket mainaig kadagiti government-owned and controlled corporations (GOCCs), kas iti Philippine Health Insurance Corp. (PhilHealth), ken Foreign-Assisted Projects (FAPs).
