LAOAG CITY – Kinumpirmaran ni Barangay Chairman Ruben Ancheta iti Barangay Barit ditoy ciudad ti Laoag ti pannakaigalot ti ima ti maysa a menor de edad a lalaki.
Segun kenni Ancheta, dagiti ubbing a kadwa met laeng ti maseknan ti nangigalot kenkuana ken maipagarop nga angaw laeng daytoy basar pay iti palawag da iti PNP.
Inbatad na a ti madi a pasamak iti daytoy ket ti panangipost ti maysa a lalaki iti social media.
Inlawlawag na a kalpasan a naipost daytoy iti facebook ket kinasarita da daytoy ken nagpakawan iti inaramid na.
Kunana a basar ti palawag ti nagpost ket nakita na a nagay-ayam dagiti ubbing ken nakita na laengen a nagalot ti ima ti ubing.
Nupay kasta, naamoan nga inalaan na pay laeng ti ladawan daytoy sakbay da nga inukasan ken nagkukuyog da a napan nagmeryenda.
Kunana a naamoan na daytoy a pasamak babaen iti CSWDO ken napan da kinasarita.
Kabayatanna, inlawlawag ni Ancheta a saan a nagtakaw ti kalding ti ubing gapo ta ti nagpost iti ladawan ket kadwa na daytoy ken ti ama na nga agtartaraken iti nasao nga ayop.
Inlawlawag met ni Police Lt. Col. Rafael Lero, chief of police PNP Laoag a naalarma da idi nakita da ti ladawan ti ubing a naigalot ti saka ken ima na iti Barangay Barit ditoy ciudad.
Segun kenni Lero, dagus a nagturong dagiti otoridad iti lugar ken iti panagimbestigar da ken basar iti palawag dagiti karaman iti daytoy ket ang-angaw laeng.
Inbatad na nga uray ti pamilya dagiti menor de edad ket saan da nga interesado a mangipila ti reklamo kontra iti lalaki a nagpost ti ladawan.
Inlawlawag na a gapo ta saan nga interesado ti pamilya dagiti ubbing ket agdepende iti CSWDO ti mangipila da ti kaso no laketdi adda ti makita da a panagabuso a napasamak.
Kunana a no adda ti panagabuso a makita ti CSWDO ket akumudaren ti PNP ti affidavit ken maisubmitir dagiti kasapulan a dokumento ti piskalya.
Mainaig iti daytoy, iti pannakisarita ti grupo ti Bombo Radyo iti lalaki a nagpost ket naglikudan na nga isuna a mismo ti nangigalot iti ubing ken inannugot na a ti kamali na ket inpost na iti social media ti nasao a ladawan.
Kabayatanna, ummuna metten nga inbaga ti CSWDO babaen kenni Mrs. Perlita Cabello nga awan ti makita da a senyales nga adda ti napasamak a panagabuso.
Nabalakadan met dagiti ubbing a mapan iti opisina ti CSWDO para iti counseling.
