LAOAG CITY – Inpeksa ni Mr. Edison Tolentino iti Barangay Sta. Catalina iti ili ti Pasuquin ti sakit ti nakem na gapu ta saan a naala kas benepisyaryo ti Social Amelioration Program (SAP).
Inbatad na nga inikkan da ti porma a pinirmaan na ngem saan a naala a benepisyaryo ti SAP.
Inbaga na nga inyuman na daytoy a banag iti kapitan iti barangay da ket naibalakad kenkuana a mapan agreklamo iti opisina ti DSWD nga isu met ti inaramid na.
Namintallo a daras a nagsubli-subli iti opisina ti DSWD gapu ta idi damo na ti napan idi biernes ken inbaga da kenkuana nga agsubli iti kabigatan na, ngem iti panagsubli na ket awan ti opisina gapu ta aldaw ti sabado.
Gapu iti daytoy, nagsubli manen idi Lunes ket ditoy a naduktalan na a ti naipan a trabaho na ket vegetable dealer isut gapuna a saan a naala kas benepisyaryo ti SAP.
Inpetteng na a daytoy ti kayat na a maamoan no nangalaan dagiti maseknan ti impormasyon a maysa daytoy a vegetable dealer idinto a maysa laeng a gagangay a mannalon.
Innayon na a nagkamang ditoy Bombo Radyo Laoag gapu ta patien na nga isu ti makatulong kenkuana.
