LAOAG CITY – Addan iti nasayaat a kasasaad ti lakay a naggandat nga agpakamatay iti Barangay Nanguyudan iti ili ti Paoay.
Daytoy ti kinumpirmaran ni Pol. Lt. Marlon Martines, ti deputy chief of police iti ili ti Paoay.
Nabigbig ti biktima a ni Manuel Lucas y Ortal, agtawen ti 73, balo ken residente met laeng iti nasao a barangay.
Immuna iti daytoy, nakita ti kabsat ti biktima nga adda ti nagayos a dara manipod iti tawa ti kwarto ni Lucas.
Gapu iti daytoy, pinilit da a linukatan ti ridaw ti kwarto ti biktima ket ditoy a nakita da a dara-daran kalpasan nga iniwa na ti pulso na babaen ti panagusar na ti buneng nga agatiddog ti 10 a pulgada.
Dagus a nagpatulong ti pamilya ti biktima iti PNP para iti pannakaitaray ni Lucas iti Mariano Marcos Memorial Hospital and Medical Center iti ciudad ti Batac.
Inbaga ni Martines a rumrumuar a ginandat ti biktima ti agpakamatay gapu iti maipagarop a panagsaksakit ti rusok na.
Innayon na a basar iti kabagyan ti biktima, tunggal sumken ti panagsakit ti rusok ni Lucas ket kanayun na nga ibaga a kayat nan ti matay.
