LAOAG CITY – Inlawlawag ti saanen a nagpabigbig a residente iti ili ti Piddig ti maipagarup a saan a pannakaipalubos a dumalan iti rt-pcr test ken mai-cremate ti lolo na nga immuna a nagpositibo iti antigen test.
Segun iti apoko, naipan iti ospital ti lolo na gapu ta marigatan nga umanges ken iti kaadda na iti Piddi Ditstrict Hospital ket kayatda a matubuan daytoy.
Nu pay kasta, inbatad na a sakbay iti pangaldaw ket pimmusay met laeng ti lolo na.
Mainaig iti daytoy, kuna na a basar iti kasinsinna nga isu ti nagbantay iti ospital ket dimmalan ti antigen test ti lolo da ket positibo daytoy.
Gapu iti daytoy, inbatad na a kayat ti ospital a dagus a maitabon ti bangkay ti lolo iti dumpsite.
Inpakammo na a dinamag na iti doctor nu mabalin a ma-cremate ken dumalan iti rt-pcr test ti lolo na tapno maamoan nu positibo daytoy iti covid-19 ngem saanda nga inpalubos gapu ta maipagarup nga isu ti mandar ni provincial consultant, Dr. Norman Rabago.
Kuna na nga inpetteng ti doctor a masapol a maitabon a dagus ti bangkay, banag a saanda a maakseptar gapu ta awan pay ti pammaneknek a positibo ti lolo na iti virus.
Inbatad na a kiniddaw na a makasarita ni Dr. Rabago tapno malawlawagan ti nasao a banag ngem saan a naikkan ti gundaway daytoy.
Kabayatanna, kuna ti apoko a dimmalan met laeng ti lolo na iti RT-PCR test sumagmamano nga oras pay laeng ti napalabas kalpasan a pimmusay.
Inbunannag na a nu aniaman ti resulta daytoy ket sidadaan da a mangakseptar.
Innayun ti apoko a kayat da laeng a maikkan ti lolo na ti naurnos a pannakaidulin uray iti maudi a gundaway.
