LAOAG CITY – Nagkamang ti maysa a lakay iti PNP Laoag kalpasan a kinabkabil dagiti dua a barangay kagawad iti Brgy. 56-A Bacsil North ditoy siudad ti Laoag.
Nabigbig ti biktima a ni Baltazar Pacis y Bañes, agtawen ti 71, naasawaan ken residente iti nasao a barangay idinto a dagiti suspek ket da Jorge Calzada ken Jemiesan Agsalda, agpada a barangay kagawad ken residente iti nasao met laeng a barangay ken maysa ti saan pay a nabigbig a suspek.
Basar iti imbestigasyon, bayat nga adda ti biktima iti balkonahe iti pagtaengan da ket kellaat a simrek dagiti suspek ket ditoy a kinabkabil da ti biktima agingga a naawanan ti poot.
Gapu iti daytoy, insigida nga intaray ti maysa kadagiti suspek ti biktima iti ospital a nagsagaba ti sugat iti rupa ken iti ulo na.
Kabayatanna, naakusaran ti biktima a pinaturongan na ti paltog iti karruba da rason a binugbog dagiti suspek.
Naglikudan met ti biktima iti alegasyon kontra kenkuana.
