LAOAG CITY – Adu dagiti nasair ti puso na a netizens iti kasasaad ti maysa a lakay nga agmaymaysa nga agbibiag iti nasulimek a paset ti Brgy. Lydia iti ili a Marcos kalpasan a nagviral ti ladawanna iti social media.
Nangisayangkat ti fund raising activity ni Mr. Alexander Ganal, agpapaay iti Treasury Office iti Laoag City Public Market and Commercial Complex, residente iti ili a Sarrat ngem agdama nga agnanaed ditoy ciudad ti Laoag para iti pannakaipatakder ti balay ni Lolo Alfredo, agtawen ti 82.
Immuna iti daytoy, kuna ni Ganal a nagpost daytoy iti social a media nga agbirbirok iti 100 a tattao nga agdonar iti sagsangaribo a pisos.
Iti agdama, nakaukkonen ti 75 ribo a pisos ni Ganal manipod kadagiti nagduduma nga indibidwal a naayat a timmulong.
Malaksid iti panagpatakder da ti balay ni Lolo Alfredo ket, inbatad ni Ganal a plano da pay nga ikkan ti taraknen a dingwen ti nasao a lakay.
Innayonna a suportado ti 1st Provincial Mobile Force Company ti nasao a proyekto gapu ta isuda a mismo iti agtrabaho para iti pannakaipatakder ti balay ti lakay.
Inbatad na nga indonar pay ti lokal a gobierno iti ili ti Marcos ti daga a pakaipatakderan ti balay ni Lolo Alfredo.
Innayonna a no adda ti sobra dagiti donasyon ket maited to met laeng amin kenni Lolo Alfredo.
Manamnama a mairugi ti pannakaipatakder ti balay ti lakay kalpasan ti community quarantine.
